.JPG)
ទោះបីជាមិនទាន់មានឱកាសក្នុងការផលិតបទចំរៀងរបស់ខ្លួនទៅក្នុងថាសចំរៀង ក៏ក្រុមយុវនិស្សិតមួយក្រុម ដែលស្រឡាញ់វិស័យសិល្បះនិងចង់បង្កើតស្នាដៃដោយខ្លួនឯងបានប្រមូលផ្តុំបង្កើតជាក្រុមចំរៀងផ្ទាល់ខ្លួន ដើម្បីបញ្ចេញសមត្ថភាពរបស់ខ្លួននៅលើវិស័យតែងនិពន្ធលេងឧបករណ៌តន្រ្តី និងឧបករណ៌ខ្មែរបុរាណ ។
បទចំរៀងថ្មីៗនិពន្ធដោយខ្លួនឯង ជាមួយនឹងបទភ្លេងកែច្នៃដែលបន្លឺឡើងយ៉ាងរងំចេញពីឧបករណ៌ ហ្គីតា លាយឡំគ្នានឹងឧបករណ៌ខ្មែរបុរាណនឹងត្រូវបានបង្ហាញនាល្ងាចថ្ងៃសៅរ៍នេះដោយនិស្សិតវ័យក្មេងដែលបានបញ្ចប់ការសិក្សា និងកំពុងបន្តការសិក្សានៅសាកលវិទ្យាល័យចំនួន៦រូប ។
យុវនិស្សិតវ័យ២០ឆ្នាំ ឈ្មោះ “អ៊ួន បឋម” ហៅ ”សាយ” គឺជានិស្សិតឆ្នាំទី២ នៃសាកលវិទ្យាល័យភូមិន្ទនិតិសាស្ត្រ និងវិទ្យាសាស្រ្តសេដ្ឋកិច្ចបានឲ្យដឹងថា “ការបង្កើតក្រុមតន្រ្តីនេះឡើង គឺដោយសារតែឧបនិស្ស័យរបស់ពួកខ្ញុំផង និងចង់បង្កើតបរិយាកាសសប្បាយនៅពេលទំនេរពីការសិក្សាផង ដោយធ្វើអ្វីដែលមានប្រយោជន៌ដល់សង្គម ដូចជាការនិពន្ធបទភ្លេងបទចំរៀងថ្មីៗ និងច្រៀងដោយខ្លួនឯងជាដើម។”
សាយដែលជាប្រធានក្រុមតន្រ្តីនេះមានស្រុកកំណើតនៅខេត្តរតនគីរីជាមួយនឹងសមាជិករួមក្រុមម្នាក់ឈ្មោះ គង់ ដែលជាអ្នកលេងហ្គីតាបាស ចំណែកឯសមាជិក៣នាក់ទៀតដែលជាអ្នកលេងឧបករណ៌ភ្លេងខ្មែរបុរាណគឺជាសិស្ស និងនិស្សិតដែលមានប្រភពមកពីសមាគមសិល្បះខ្មែរអមតៈ និង សាកលវិទ្យាល័យភូមិន្ទវិចិត្រសិល្បះ និង និស្សិតម្នាក់ទៀតដែលមានជំនាញខាងឧបករណ៌សម័យ ចំណែកនិស្សិតមកពីខេត្តរតនគីរីរូបនេះ ជាអ្នកលេងហ្គីតាផង ច្រៀងចំរៀងផង។
សាយបានរំលឹកឡើងថា កាលដែលគេមានគំនិតបង្កើតក្នុងការបង្កើតក្រុមតន្រ្តីនេះឡើងដោយសារតែបងប្អូន៣នាក់ផ្សេងទៀតរបស់គេ គឺជាអ្នកដែលមាននិស្ស័យខាងសិល្បះ ។ ទោះបីជាពួកគេកំពុងប្រកបរបរផ្សេងៗ ក្រៅពីអាជីពសិល្បះនេះក៏ដោយ ក៏ពួកគេតែងតែយកពេលទំនេរផ្ទាល់ខ្លួនជួបជាមួយមិត្តភក្តិដែលមានឧបនិស្ស័យប្រហាក់ប្រហែលគ្នា ដើម្បីបង្កើតអ្វីដែលថ្មី តួយ៉ាងដូចជាបងប្រុសរបស់សាយ ដែលបានតែងបទចំរៀងថ្មីៗជាច្រើនជាមួយនឹងមិត្តភក្តិរបស់គាត់ដូចគ្នា។
ដោយមានការសហការពីឆាយនីសហោស និងក្រុមកុនខ្មែរ កូនខ្មែរ បទចំរៀងថ្មីៗ ៥បទបែបយុវវ័យ របស់សាយ និងបទចំរៀងជាច្រើនបទទៀតពីសមាគមសិល្បះខ្មែរអមតៈ នឹងត្រូវបានលើកយកមកច្រៀងនាឱកាសនោះ។
ផលិតករខ្មែរ បារាំង លោក ជូ ដាវី គឺជាអ្នកសម្របសម្របកម្មវិធីប្រគំតន្រ្តីនេះ និងជាអ្នកបង្កើតក្រុមកុនខ្មែរ កូនខ្មែរ ឲ្យដឹងថា “បើទោះបីជាខ្ញុំមិនអាចស្តាប់យល់ទាំងស្រុង នូវអត្ថន័យបទខ្មែរក៏ដោយ ប៉ុន្តែខ្ញុំគិតថា វាជារឿងកំរណាស់ដែលកូនខ្មែរអាចបង្កើតនូវសាច់ភ្លេង បទចំរៀង ព្រមទាំងច្រៀងបានយ៉ាងពិរោះមិនចាញ់អ្នកចំរៀងអាជីពឡើយ។ លោកបន្តថា “ខ្ញុំសង្ឃឹមថា នឹងមានឱកាសសហការរៀបចំព្រឹត្តិការណ៌បែបនេះម្តងទៀតនៅពេលខាងមុខ។”
ទាក់ទងនឹងវិស័យសិល្បះរបស់ខ្មែរ សាយ យល់ឃើញថា “វិស័យបទចំរៀង មិនទាន់អាចនិយាយបានថារីក ចំរើននោះទេ ពោលគឺទន់ខ្សោយណាស់ដោយសារតែយើងនៅចំលងបទគេនៅឡើយ ទោះបីជាច្រៀងពិរោះយ៉ាងណាក៏ដោយ បទគេនៅតែជាបទគេដដែល។”
ក្នុងនាមជាកូនខ្មែរមួយរូបដែលស្នេហាវិស័យសិល្បះ សាយបានផ្តាំផ្ញើដល់គ្រប់ស្ថាប័នទាំងអស់ឲ្យចេះលើកស្ទួយវិស័យសិល្បះខ្មែរតាមរយៈការគាំទ្រស្នាដៃខ្មែរ និងមិនលួចចំលងស្នាដៃគ្នាដើម្បីផលប្រយោជន៌ផ្ទាល់ខ្លួន ជាពិសេសត្រូវចេះឲ្យតម្លៃដល់សិល្បករ ហើយសិល្បករទៀតសោតត្រូវប្រព្រឹត្តខ្លួនឲ្យល្អដល់សង្គម ចំណែកឯក្រុមហ៊ុន និងផលិតករនានាត្រូវព្យាយាមនិពន្ធស្នាដៃដោយខ្លួនឯង ទើបមានការគាំទ្របានយូរអង្វែង។
លោកអ្នកអាចចូលរួម ការប្រគំតន្រ្តីនេះដោយសេរី ពីម៉ោង ៧ និង ៣០នាទី ល្ងាច រហូតដល់ម៉ោង៩យប់នៅឆាយនីសហោស ផ្ទះលេខ៤៥ ផ្លូវស៊ីសុវត្តិ ទល់មុខកំពង់ផែក្រុងភ្នំពេញ ដើម្បីឲ្យបានដឹងច្បាស់ថា ក្រុមនិស្សិតខ្មែរយើងមានស្នាដៃពិសេសដល់កំរិតណា ក្នុងការបង្កើតស្នាដៃផ្ទាល់ខ្លួនដើម្បីអភិវឌ្ឍសិល្បះខ្មែរឲ្យរីកចំរើន។
