ដោយ អ៊ូ មុំ
កម្មវិធី«អ្នកជាបុរសពិត» បានជ្រើសរើសលោក ឈួន សុជាតិ ជាអ្នកឈ្នះកាលពីថ្ងៃ អាទិត្យ ទី២៧ ខែកញ្ញ នៅស្ថានីយ៍ទូរទស្សន៍ ប៉ុស្តិ៍ លេខ៩។ លោក ឈួន សុជាតិ អាចយកឈ្នះចិត្តរបស់ទស្សនិជនខ្មែរដែលមានឱកាសផ្ញើរសារគាំទ្រអ្នកចូលរួមប្រកួតនៅក្នុងកម្មវិធីថ្មីមួយនេះ ហើយនៅទីបញ្ចប់លោកអាចយកឈ្នះចិត្ត
អ្នកផ្តល់ពិន្ទុដែលបានពិនិត្យដំណាក់កាលប្រកួតទាំង១១របស់បេក្ខជននីមួយៗ។បន្ថែមលើជ័យជំនះដ៍ត្រចេះត្រចង់នេះ សុជាតិ ក៏ទទួលបានប្រាក់៣.០០០ ដុល្លារអាមេរិក និងម៉ូតូហុងដា ហនណែត២.៥00 cc មួយគ្រឿងជាការលើកទឹកចិត្តផងដែរ។
តាំងតែពីគាត់មានអាយុជាង១០ឆ្នាំម្ល៉េះ សុជាតិ បានចាត់ចែងកិច្ចការផ្ទះ ឲ្យគ្រួសាររបស់គាត់ជាពិសេសសម្រាប់ប្អូនប្រុសទាំង៣នាក់របស់គាត់។
ដោយសារតែ សុជាតិ បានឃើញគ្រួសាររបស់គាត់បែកបាក់គ្នាដោយបញ្ហាជាច្រើន បទពិសោធន៍នេះបានធ្វើបង្រៀនគាត់ឲ្យចេះវិធីបញ្ជៀសបញ្ហាច្រំដែលនេះ និងអាចធ្វើឲ្យគ្រួសារថ្មីមួយមានសុភមង្គលបាន។
ក្នុងនាមជាបុគ្គលិកបច្ចេកវិទ្យាព័ត៌មានវិទ្យាមួយរូបនៅក្រុមហ៊ុន ដឹផ្លេស ( The Place Company) សុជាតិ បានប្រាប់អ្នកយកព័ត៌មានយើងថា ៖ «ក្នុងនាម ជាបុរសម្នាក់ យើងគួរតែយល់ពីការលំបាករបស់ស្រ្តី ហើយត្រូវតែផ្តល់តម្លៃដល់គាត់ទាំងក្នុងកិច្ចការផ្ទះ និងកិច្ចការខាងក្រៅផ្ទះ ជាពិសេសយើងត្រូវលើកទឹកចិត្តឲ្យគាត់ចូលរួមក្នុងកិច្ចការសង្គម»។
ខាងក្រោមនេះជាបទសម្ភាសន៍រវាងអ្នកយកព័ត៌មាន ភ្នំពេញ ប៉ុស្តិ៍ និងលោក ឈួន សុជាតិ។
តើមុនដំបូង កម្មវិធី «អ្នកជាបុរសពិត» នេះ អាចធ្វើឲ្យលោកចាប់អារម្មណ៍តាមរបៀបណា?
នៅពេលដែលខ្ញុំបានឃើញការប្រកាសអំពីការប្រកួតនេះ នៅតាមទស្សវដ្តី អង្គរធំ ខ្ញុំចាប់អារម្មណ៍យ៉ាងខ្លាំងទៅលើរូបភាពបុរស កំពុងកាន់វែកឆាធ្វើការក្នុងផ្ទះបាយ និងការដើរផ្សងព្រេងនៅក្នុងព្រៃជាដើម។ខ្ញុំចូលចិត្តរូបនេះដោយសារតែខ្ញុំមានបទពិសោធន៍ច្រើននៅក្នុងកិច្ចការនេះ ខ្ញុំចង់សាកល្បងវា និងចែករំលែកបទពិសោធន៍របស់ខ្ញុំជាមួយអ្នកដទៃ។
តើលោកទទួលបានបទពិសោធន៍អ្វីខ្លះនៅក្នុងការប្រកួតនេះ?
នេះជាកម្មវីធីអប់រំមួយសម្រាប់បុរសឲ្យពួកគាត់យល់ពីកិច្ចការមួយចំនួនរបស់ស្រ្តី ដូចជា ការចំអិនម្ហូប និងការមើលថែទាំកូនជាដើម។ទោះបីជាយ៉ាងណាក៏ដោយ ក្នុងនាមជាបុរសយើងត្រូវតែជំនះឲ្យបាននៅដំណាក់
កាលទាំង១១ដែលខ្ញុំមិនអាចចងចាំទាំងអស់បាននោះទេ។ វាមានដូចជាការរស់នៅឆ្ងាយពីក្រុមគ្រួសារ ការសមយុទ្ធនៃកងទ័ពនៅលើសមរភូមិប្រយុទ្ធ ការបួសជាព្រះសង្ឃ និងការការពារខ្លូនយើងឲ្យឆ្ងាយពីជំងឺអេដស៍ ជាដើម។ ខ្ញុំគិតថាកិច្ចការរបស់ស្រ្តីមិនមែនជាការងាយស្រួលសម្រាប់បុរសដែលមិនធ្លាប់មានបទពិសោធន៍នោះទេ។
ក្នុងចំណោមដំណាក់កាលទាំងអស់ តើដំណាក់កាលមួយណា ដែលលំបាកចំពោះអ្នកជាងគេ?
ដោយសារតែខ្ញុំជាបុរសដែលធ្លាប់មានបទពិសោធន៍ក្នុងកិច្ចការនេះពីមុននោះ ខ្ញុំមិនគិតថាវាជាការលំបាកចំពោះខ្ញុំនោះទេ។ប៉ុន្តែខ្ញុំសូមជំរាបថាកិច្ចការរបស់ស្រ្តី មិនមែនជាការងាយស្រួលសម្រាប់បុរសនោះទេ ហើយកិច្ចការរបស់បុរសក៏មិនមែនជាការងាយស្រួលសម្រាប់ស្រ្តីនោះដែរ។ខ្ញុំចង់និយាយថាប្រសិនបើស្រ្តីធ្លាប់មានបទពិសោធន៍ក្នុងកិច្ចការបុរស ពួកគេក៏អាចធ្វើកិច្ចការបុរសបានដូចគ្នាដែរ។
តើដំណាក់កាលមួយណាដែលលោកចូលចិត្តជាងគេ? ព្រោះអ្វី?
ខ្ញុំចូលចិត្តដំណាក់កាលចូលទៅក្នុងផ្ទះខ្មោចជាងគេ ព្រោះវាបានផ្តល់អត្តន័យយ៉ាងជ្រាលជ្រៅដល់ពួកយើង។វាមិនគ្រាន់តែផ្តល់ឱកាសឲ្យបុរសបានបង្ហាញពីសមត្តភាពដែលមិនខ្លាចខ្មោចរបស់ពួកគេប៉ុណ្ណោះទេ ប៉ុន្តែវាក៏បានប្រៀបធៀបការវាយដំរបស់ស្វាមី ឬបុរសទៅលើស្រ្តីផងដែរ។ខ្ញុំគិតថាដំណាក់កាលនេះវាបានអប់រំបុរសដែលមានអំណាចជាងស្រ្តី កុំឲ្យពួកគេធ្វើបាបគ្រូសារ ឬរំលោភសិទ្ធរបស់ស្រ្តីដែលមានអំណាចតិចតួចជាង។
សម្រាប់យោបល់របស់លោកផ្ទាល់ តើហេតុអ្វីបានជាគណៈកម្មាធិការ ជ្រើសរើសលោកជាអ្នកឈ្នះនៅក្នុង
កម្មវិធី«អ្នកជាបុរសពិត» នេះ?
នៅក្នុងការជ្រើសរើសដំបូង គណៈកម្មាធិការ បានប្រាប់ឲ្យពួកយើងស្វែងរកអ្វីមួយដើម្បីបង្ហាញថា យើងជាបុរសពិត។នៅពេលនោះខ្ញុំបានដាក់រូបថតរបស់ខ្ញុំដែលខ្ញុំបានជ្រើសរើសដោយផ្ទាល់ដៃ ដែលរូបថតនោះបានពិពណ៌នាអំពីបទពិសោធន៍ជាច្រើននៅក្នុងជីវិតរបស់ខ្ញុំនៅកន្លែងផ្សេងៗជាច្រើន ដូចជានៅ សាលា នៅកន្លែងធ្វើការ និងនៅវាលស្រែចាប់តាំងពីខ្ញុំនៅក្មេងរហូតមកដល់ពេលនេះ។ខ្ញុំគិតថា គណៈកម្មាធិការ បានចាប់អារម្មណ៍លើរូបខ្ញុំដោយសារតែចំនុចខាងលើនេះឯង។
សរុបមក ខ្ញុំគិតថា ខ្ញុំមានសមត្ថភាពគ្រប់គ្រាន់ក្នុងការបំពេញរាល់កិច្ចការទាំងអស់នេះ។
ចំនុចដែលធ្វើឲ្យខ្ញុំទទួលបានជោគជ័យគឺ ការសាមគ្គីគ្នា។ទោះបីខ្ញុំនៅក្មេងក៏ដោយ ខ្ញុំយល់ច្បាស់ណាស់ថា អ្វីជាគ្រួសារ។ដោយសារតែខ្ញុំបានរស់នៅក្នុងគ្រួសារដែលមានជីវភាពយ៉ាប់យឺត ខ្ញុំដឹងអំពីបញ្ហាលំបាកនានា ជាពិសេសគឺខ្ញុំយល់ពីអារម្មណ៍របស់ម្តាយខ្ញុំ។
តើអ្នកយល់ឃើញយ៉ាងណា ចំពោះស្ថានភាពស្រ្តីនៅក្នុងប្រទេសកម្ពុជា នៅពេលបច្ចុប្បន្ន?
ខ្ញុំគិតថាឥឡូវនេះ ស្រ្តីមានការងារក្នុងតំណែងខ្ពស់ជាងមុន និងច្រើនជាងមុនក្នុងសង្គម ដោយសារតែរាជរដ្ឋាភិបាលរបស់យើងបានផ្តល់លទ្ធភាពដល់ពួកគាត់ច្រើនជាងមុន។ប៉ុន្តែនៅក្នុងគ្រួសារសិទ្ធិរបស់ស្រ្តីនៅតែទាបជាងបុរសដដែល ដោយសារតែស្រ្តីភាគច្រើនគ្រាន់តែជាមេផ្ទះប៉ុណ្ណោះ ដូច្នេះហើយបុរសតែងតែមើលស្រាលសមត្ថភាពរបស់ស្រ្តីដែលមិនអាចធ្វើការនៅខាងក្រៅផ្ទះបាន។
តើលោកគិតថាអ្វីខ្លះដែលបុរសគួរតែត្រូវធ្វើការផ្លាស់ប្តួរចំពោះស្រ្តីនៅក្នុងសង្គមខ្មែរ?
ខ្ញុំគិតថា ក្នុងនាមយើងជាបុរស យើងគួរតែយល់អំពីការលំបាករបស់ស្រ្តី ព្រោះកិច្ចការរបស់ស្រ្តីមិនមែនជារឿងងាយស្រួលដូចបុរសភាគច្រើនបានគិតនោះទេ។ផ្ទុយទៅវិញ យើងជាបុរសត្រួវតែផ្តល់លទ្ធភាពដល់ស្រ្តី ហើយលើកទឹកចិត្តឲ្យពួកគាត់ចូលរួមក្នុងកិច្ចការសង្គម ទោះបីពួកគាត់ជាស្រ្តីមេផ្ទះ ឬជាអ្នកធ្វើការនៅខាងក្រៅក៏ដោយ។ ប្រសិនជាយើងអាចធ្វើបាន យើងនឹងមានសុភមង្គលនៅក្នុងគ្រួសារ និងការអភិវឌ្ឍន៍សង្គមក្នុងពេលតែមួយជាក់ជាមិនខាន។
តើក្រោយពីទទួលបានជ័យលាភី លោកនឹងធ្វើការងារអ្វីខ្លះសំរាប់តំណែងជា «បុរសពិត » នេះ?
ខ្ញុំមានគំនិតចង់ធ្វើការងារខ្លះៗសំរាប់កម្មវិធីដែរ តែសព្វថ្ងៃមិនមានការងារអ្វីពីអ្នកឧបត្ថម្ភកម្មវិធីនៅឡើយហើយខ្ញុំមានយោបល់ចង់ឲ្យកម្មវិធីនេះ នៅតែបន្តស្វែងរកបេក្ខជនមកប្រកួតប្រជែង ដើម្បីពង្រឹងសមត្ថភាពឲ្យពួកគាត់ឲ្យយល់ពីភារកិច្ចរបស់ខ្លួន និងលើកតម្លៃដល់ការងារស្រ្តីនៅក្នុងសង្គម ។ លើសពីនេះតាមរយកម្មវិធីនេះ ខ្ញុំក៏ចង់បន្តការសិក្សាថ្នាក់អនុបណ្ឌិតដើម្បីពង្រឹងសមត្ថភាពរបស់ខ្ញុំ ជួយការងារក្នុងសង្គមជាតិផងដែរ ។
ប្រែសម្រួលដោយ គង់ សុគន្ធ
No comments:
Post a Comment